افتح القائمة الرئيسية

أحمد فؤاد نجم - ممنوعات

الممنوعات

ممنوع من السفر

ممنوع من الغنا

ممنوع من الكلام

ممنوع من الإشتياق

ممنوع من الإستياء

ممنوع من الإبتسام

وكل يوم فى حبك

تزيد الممنوعات

وكل يوم باحبك

أكتر من اللى فات

حبيبتي يا سفينه

متشوقه وسجينه

مخبر فى كل عقده

عسكر فى كل مينا

يمنعني لو أغير

عليكي أو أطير

إليكي واستجير

بحضنك

أو أنام

فى حجرك الوسيع

وقلبك الربيع

أعود كما الرضيع

بحرقه الفطام

حبيبتي يا مدينه

متزوقه وحزينه

فى كل حاره حسره

وف كل قصر زينه

ممنوع من إني أصبح

بعشقك .. أو أبات

ممنوع من المناقشه

ممنوع من السكات

وكل يوم فى حبك

تزيد الممنوعات

وكل يوم باحبك

أكتر من اللى فات