افتح القائمة الرئيسية

أحمد فؤاد نجم - بهية

يسبق كلامنا

سلامنا يطوف..

ع السامعين معنا .. عصفور محندق يزقزق .. كلام موزون وله معنى .. ع الأرض سمرا وقمرة .. وضفة ونهر ومراكب .. ورفاق مسيرة عسيرة .. وصورة حشد ومواكب .. ف عيون صبية بهية .. عليها الكلمة والمعنى .. مصر يا امة يا بهية .. يا ام طرحة وجلابية .. الزمن شاب وانت شابة .. هوة رايح وانت جاية .. جاية فوق الصعب ماشية .. فات عليكي ليل ومية .. واحتمالك هوة هوة .. وابتسامتك هية هية .. تضحكي للصبح يصبح .. بعد ليلة ومغربية .. تطلع الشمس تلاقيكي .. معجبانية وصبية يا بهية .. الليل جزاير جزاير .. يمد البحر يفنيها .. والفجر شعلة هتعلى .. وعمر الموج ما يطويها .. والشط باين مداين .. عليها الشمس طوافة .. إيدك ف إيدنا ساعدنا .. دي مهما الموجة تتعافى .. بالعزم ساعة جماعة .. وبالإصرار نغطيها .. مصر يا امة يا سفينة .. مهما كان البحر عاتي .. فلاحينك ملاحينك .. يزعقوا للريح يواتي .. اللي ع الدفة صنايعي .. واللي ع المجداف زناتي .. واللي فوق الصاري كاشف .. كل ماضي وكل آتي .. عقدتين والتالتة تابتة .. تركبي الموجة العفية .. توصلي بر السلامة .. معجبانية وصبية يا بهية .. ويعود كلامنا بسلامنا يطوف .. ع الصحبة حلواني .. عصفور محني يغني .. على الأفراح ومن تاني .. يرمي الغناوي تقاوي .. تبوس الأرض تتحنى .. تفرح وتطرح وتسرح .. وترجع تاني تتغنى .. اللي بنى مصر كان ف الأصل حلواني