افتح القائمة الرئيسية

أحمد فؤاد نجم - التحالف

يعيش أهل بلدى

وبينهم مفيش

تعارف

يخلى التحالف يعيش

تعيش كل طايفه

من التانيه خايفه

وتنزل ستاير بداير وشيش

لكن فى الموالد

يا شعبى يا خالد

بنتلم صحبه

ونهتف يعيش

يعيش اهل بلدى

يعيش المثقف على مقهى ريش

يعيش يعيش يعيش

محفلط مزفلط كتير الكلام

عديم الممارسه

عدو الزحام

بكام كلمه فاضيه

وكام اصطلاح

يفبرك حلول المشاكل قوام

يعيش المثقف

يعيش يعيش يعيش

يعيش اهل بلدى

يعيش التنابله

فى حى الزمالك

وحى الزمالك

مسالك مسالك

تحاول تفكر تهوب هنالك

تكدر حياتك

بلاش المهالك

لذلك

اذا عزت توصف حياتهم

تقول الحياة عندنا

مش كذلك

وممكن تشوفهم فى وسط المدينه

اذا مر جنبك

أتومبيل سفينه

قفاهم عجينه

كروشهم سمينه

جلودهم بتضوى

دماغهم تخينه

سنانهم مبارد تفوت فى الجليد

ما فيش سخن بارد

بيكلوا الحديد

ما دام نهر وارد

وجاى م الصعيد

تزيد الموراد

كروشهم تزيد

وتسمع وتسلم

بأن التنابله

أو الأكالين

حيسمع كبيرهم

ويعمل مقابله

مع الفلاحين

ويحصل تحالف

ما بين الجميع

وتملا المصارف

بدم القطيع

أطع الخليفه

وأطع والديك

دا مفروض عليك

تزرع وتبعت لحى الزمالك

وحى الزمالك

مسالك مسالك

تحاول تفكر تهوب هنالك

تكدر حياتك بلاش المهالك

لذلك

أذا حد جابلك سيرتهم

تبسمل تكبر

وتهتف كذلك

يعيش التنابله

يعيش يعيش يعيش

يعيش اهل بلدى

يعيش الغلابه

فى طى النجوع

نهارهم سحابه

وليلهم دموع

سواعد هزيله

لكن فيها حيله

تبدر تخضر جفاف الربوع

مكن شغل كايرو

ما يتعبش دايره

لا ياكل

ولا حتى يقدر يجوع

يا غلبان بلدنا

يا فلاح ياصانع

ياشحم السواقى

يا فحم المصانع

يا منتج

يا مبهج

يا آخر حلاوه

يا هادى

يا راضى

يا عاقل

يا قانع

ما تتعبش عقلك

فى شغل السياسه

وشوف انت شغلك

بهمه وحماسه

وعود عيالك فضيلة الرضا

لأن احنا طبعا

عبيد القضا

ورزقك ورزقى ورزق الكلاب

دا موضوع مؤجل ليوم الحساب

كمان الصحافه

حتكتب فى حالتك

وتنشر مناظر لخالك وحالتك

وتطلع يامسعد عليك الغناوى

وتسمع بأسمك

فى قلب القهاوى

تحبك مشيره وبنات الجزيره

وقصة غرامك

تشيع فى الرداوى

يعيش عم مسعد

يعيش يعيش يعيش